E herensia ku no por fit den niun testament

Miraki…

Ora hende muri

nos sa presís kiko pa hasi

Nos sa kon pa honra’é

rekord’é

i tene su nòmber,

su legado bibu

Kada kos ta bai “a pie de la letra”

Sin falta niun stap

Flor

Palabranan bunita

Selebra su bida

Harmonía

Rèspèt

Uhu… asina mester ta

Pero… tin otro partinan

ku nos no ta trata ku mesun kuido

I esaki… no ta konta pa nos sintimentunan so

E ta reflehá den e manera ku nos ta kombibí ku otro

Kosnan ku nunka a wordu bisa

Pordon posponé

Doló ku a keda di pròp den nos sistema, sin salida

Kosnan ku no por a finalisá… ni tampoko laga lòs

Nos sa kon pa honra loke no tei mas…

pero no semper nos sa kon pa trata ku loke ta bibu

I tin bia…

nos por mir’é den e kasnan ku ta para bira ruina

Bieu Bandoná

Yen di skèr

Kasnan ku kasi hende no por biba aden mas

No pasobra no tin hende pa biba aden…

pero pasobra

na lugá di tuma akshon

nos ta preferá laga nan para bira ruína.

E punto ta…

Tin bia e kasnan ku nos a heredá ta kuminsá revelá loke e famia a neglishá

Nos ta usa e palabranan tradishonal:  “Kondoleer di pièrde” “Es ku Dios ke…”  “Deskanso” “Amèn” Ma mientras e kurpa ta bira unu ku tera tin bia e lasonan familiar

ku ya tabata bròs ta bira mas visibel i ta pèrdè forma

Kisas e honor no ta solamente “un bunita entiero pa su doño”

Kisas e honor berdadero ta: papia di loke ta morde, trata heridanan ku a keda habrí, laga lòs ku honor i rèspèt,  i asepta ku algun kos nunka mas lo ta meskos Uhu… Pa loke a keda no bira peso… pero espasio pa algu nobo por forma